ნავთობი

სს „საქართველოს ნავთობისა და გაზის კორპორაციას“ ნავთობისა და გაზის ძებნა-ძიებისა და მოპოვების დარგში მინიჭებული აქვს ნავთობის ეროვნული კომპანიის სტატუსი. კანონით დაკისრებულ ფუნქციებში შედის საქართველოში მოქმედი ნავთობკომპანიების საოპერაციო და კომერციული პარტნიორობა, მათ მიერ ოპერაციების დაგეგმვისა და სამუშაოების წარმოების ზედამხედველობა, სახელმწიფოს წილი ნავთობისა და გაზის მიღება და განკარგვა, ნავთობისა და გაზის ჭაბურღილებისა და სხვა ინფრასტრუქტურის ფლობა და სახელმწიფოს დავალებისამებრ მართვა და სხვა. გარდა ნავთობის ეროვნული კომპანიის ფუნქციებისა, კორპორაცია თავად მოქმედებს როგორც ოპერატორი კომპანია გარკვეულ სალიცენზიო ფართობებზე, აწარმოებს ნავთობისა და გაზის მოპოვებას, პირველად მომზადებას, შენახვას და რეალიზაციას.

ნავთობისა და გაზის საბადოების ძებნა-ძიებისა და მოპოვების ამჟამინდელ, მეცნიერულ მეთოდებს და ტექნოლოგიებს საქართველოში, ისევე როგორც მთელს მსოფლიოში, საფუძველი დაედო XIX საუკუნის მეორე ნახევარში. საქართველოში დარგის განვითარება უკავშირდება ნავთობის ეროვნულ კომპანია ,,საქნავთობს”, რომელმაც 1929 წლიდან დაიწყო ფუნქციონირება და რომლის უფლებამონაცვლეც არის ამჟამად სს „საქართველოს ნავთობისა და გაზის კორპორაცია“. გასული საუკუნის 70-ან და 80-იან წლებში თბილისის შემოგარენში აღმოჩენილმა, მაღალი მახასიათებლების მქონე საბადოებმა (სამგორი-პატარძეული-ნინოწმინდა, თელეთი, სამგორის სამხრეთი თაღი)ნავთობის წლიური მოპოვება მკვეთრად გაზარდა და 1980-1983 წლებში წლიურად 3 მლნ. ტ-ს გადააჭარბა.

დღეისათვის საქართველოს სახმელეთო ტერიტორიაზე აღმოჩენილია და დამუშავებაში იმყოფება ნავთობის - 15 და გაზ-კონდენსატის 1 საბადო. ჯამურად ამ საბადოებიდან მოპოვებულია 28 მლნ. ტონაზე მეტი ნავთობი და 3 მლრდ მ3-ზე მეტი გაზი.
საქართველოს შელფური და სახმელეთო ტერიტორია დაყოფილია სალიცენზიო ფართობებად (ე.წ. ბლოკებად).

ძებნა-ძიებისა და მოპოვების სამუშაოებს ასრულებენ საერთაშორისო ტენდერებით შერჩეული ინვესტორი კომპანიები სახელმწიფოსთან გაფორმებული პროდუქციის წილობრივი განაწილების ხელშეკრულებების საფუძველზე. უშუალოდ სამუშაოებს ასრულებენ საქართველოში შექმნილი საოპერაციო კომპანიები.

დღეისათვის საქართველოს სახელმწიფოსა და ინვესტორ კომპანიებს შორის გაფორმებულია 24 ხელშეკრულება, რომელთა ფარგლებშიც ,,საქართველოს ნავთობისა და გაზის კორპორაციის“ გარდა მოქმედებს 7 ნავთობკომპანია: “ნორიოს საოპერაციო კომპანია“; „ბლოკ ოფერეითინგ კომპანი“; ,,ქურა ბეისინ ოფერეითინგ კომპანი“; „ენ-ვი-პი ჯორჯია“; „ვესტ გალფ პეტროლიუმ ინჯინერინგ“; „ჯორჯია ქოალიშენ ენერჯი ლიმითედ“; „ოუ -ემ -ვი პეტრომი“.